Одбележувањето на овој ден е поврзан со светската конференција за Заштита на животната средина, организирана од Генералното Собрание нa Обединетите нации, а одржана во Стокхолм во 1972 година.
Главната порака од конференцијата, која и денес е актуелна е дека: „Имаме само една планета”.
Во годините после првото одбележување, беше развиена платформа за подигнување на јавната свест за проблемите со кои се соочуваме како што се: загадување на воздухот, загадување со пластичен отпад, илегална трговија со животинскиот свет, неодржливото користење на природните ресурси, покачување на нивото на морињата итн.
Во глобални рамки во 2021 година, овој настан ќе биде одбележан на 4 и 5 јуни преку виртуелен настан, отпочнувајќи ја декадата на ООН за реставрација на екосистемите. Настанот ќе вклучува инспиративни пораки од светски лидери, активисти, славни личности и музички настапи.
По повод овој ден ве охрабруваме да споделувате пораки во писмена или графичка форма како коментар на оваа објава, со што и вие би се вклучиле во одбележувањето на Светскиот ден на животната средина.